قانون المرور 2008

ايجابية القانون :-

مشروع القانون يحسب له الكثير من الايجابيات مثل التيسير علي اصحاب المركبات الثقيلة بمساواتها بالسيارات الصغيرة ومنحهم ترخيصا لمدة ثلاث سنوات، تقنين أوضاع التوك توك،اعادة النظر في تعريفة التاكسي بما يتلاءم مع ارتفاع الاسعار بما يقلل من حدة المشاحنات اليومية التي تجري بين السائقين وزبائنهم، ادخال امكانية التصالح في غالبية الجرائم، تجريم اللصقات الطائفية والدينية والعنصرية، استحداث نظام التثقيب علي الرخصة المضبوطة وتجريم محاولة استخراج اخري بطريقة غير شرعية ومجازاة من يساعد علي ذلك، وضع ضوابط لفرض الرسوم المرورية، وقف ترخيص المقطورات، منح السائقين المهنيين من شرط المدة في حالة استبدال الرخصة بأخري أعلي درجة.

تعليقي علي القانون :-

القاعدة الأولى:لو عربيتك كبيرة أو قديمة ، أستخدم المبدأ القانوني: اللي خايف على عربيته يوسع!!ملحوظة: ابعد عن سكة العربيات المخرشمة ، بيسوقوا بنظرية ضربوا الأعور على عينه!!القاعده الثانيه:البوز بيز Booze Base : اللي يدخل ببوز عربيته الأول للتقاطع هو صاحب أولوية المرور! احرص على أن تكون صاحب أول بوز.ملحوظة: لا تطبق الـ Booze Base مع أي لوري أو أتوبيس ، حرصاً على بوزك لا مؤاخذة.القاعدة الثالثة:الإشارات تكشف نواياك للأعداء ، أياك أن تستخدمها!القاعدة الرابعة:لا تترك مسافة للأمان بينك و بين السيارة التي أمامك فهذا له عدة مخاطر:1. عربية ثانية هتمليء الفراغ في ثواني و برضه ما يبقاش فيه مسافة بينك و بين الي قدامك ، كل الي كسبته انك اتأخرت لورا شوية.2. تعطي فرصة للعيال يعملوا غرز قدامك.3. كل المشاة حيغمضوا عينيهم و يعدوا من الحته دي.4. الي وراك حيقعد يزمر - لو كان مؤدب - أو تسمع شوية أسامي حيوانات لو كان سواق تاكس - مؤدب - ، أو حيخبطك من ورا لو كان سواق ميكروباص - و دول مفيش حد منهم مؤدب.الإشارات مش معمولة علشان تنظم المرور ، معمولة علشان شكل القاهرة يبقى متحضر بس!اعتمد على العساكر ( مع تحملك كامل المسؤلية لو واحد منهم شاورلك تعدي و بلدياته الناحية الثانية فتح السكة للوري ) أو يفضل أن تستعمل البوز بيز ( راجع القاعدة الثانية ).القاعدة الخامسة:اذا كنت مش واقف في الصف الأول في الاشارة اعمل حسابك تزمر بشكل متواصل و هستيري أول ما الأشارة تفتح ، لأن الناس الي قدام بيبقوا واقفين في الاشارة من زمان و جايز جداً يكونوا ناموا!!القاعدة السادسة:معظم الحوادث تحدث في التقاطعات أول الأشارة ما تحمر، كل ما عديت الإشارة الحمراء أسرع كل ما قلت فرصة انك تتخبط!القاعدة السابعة:الشارع مكان مقرف ، سوق بأسرع ما يمكن حتى تتخلص من هذا الهم بسرعة ،الناس الي ماشيين بالراحة مرضى نفسيين بيستمتعوا بالعذاب ، يستاهلوا الي يجرى لهم.القاعدة الثامنة:من حقوقك الدستورية أن تركن أمام باب المحل الذي تريد أن تشتري منه ، اذا سبقك واحد ابن ستين في سبعين و ركن قدام الباب ، فمن حقك أن تقفل عليه و تركن صف ثاني أو ثالث، و مش مهم لو الشارع اتقفل ، ايه يعني أما الناس تتعطل عشر دقائق علشان تستمتع بحقوقك الدستورية؟ هيا يعني الدنيا طارت ولا كان وراهم الديوان؟القاعدة التاسعة: م ن حقك أيضاً أن تخرج من مكان انتظارك في أي لحظة تشاء ، اكسر الدركسيون شمال و اطلع ، أي حد ماشي في الشارع لازم يقف لك فورا ً، راجع البند السابق.القاعدة العاشرة:إحترس من ثلاث أنواع من السائقيين بيسوقوا و كأنهم مش ممكن يموتوا:1. العيال الروشين الي بيلعبوا Computer Games و فاكريين إن ممكن يكسبوا Life زيادة لو ساقوا أسرع.2. موتوسيكلات توصيل الطلبات ( Home Delivery ).3. سواقين الميكروباص.ملحوظة: إوعى تحاول تثبت لحد منهم إن فكرته غلط. فاهمني!!!.القاعدة الحادية عشر:لما تشوف حادثة لازم تهدي و تتفرج - مش مهم تساعد - الحجات دي دمها أخف من الأخبار المملة بتاعة التلفيزيون ، و بعدين لما الطريق وراك يقف تحمي المجتمع من حادثة تانية.القاعدة الثانية عشر: الكناسين لازم يحللوا اللقمة الي بياكلوها ، حاول تنفعهم و ترمي أي حاجة من الشباك.القاعدة الثالثة عشر: لما تخلص سيجارة أوعى تحطها في الطفاية ، ارميها من الشباك أول ما تشوف واحد بموتوسيكل معدي جنبك ( علشان يحرم يعمل غرز ).القاعدة الرابعة عشر:من حقك أن تعبر الشارع في أي وقت و من أي مكان.القاعدة الخامسة عشر:اذا كان هناك سيارة قادمة اعمل نفسك مش واخد بالك و عدي براحتك خالص،ما تخافش، هوا حيقف، هو اهبل يدوسك و يودي نفسه في داهية؟القاعدة السادسة عشر: اياك أن تنظر نحو السيارات القادمة ، أعبر الطريق و ظهرك لها حتى لا يشك أحد قائدي السيارات أنك تراه و يحاول يخوفك علشان تقف انت.القاعدة السابعة عشر:حتى لو شفته أوعى تخاف - خصوصاً لو معاك مراتك - تبقى راجل ملو هدومك و تخاف من حته عربية؟ عرض قفاك و سيبه يتفلق.القاعدة الثامنة عشر:الرصيف ليس للمشاه ، بل لركن السيارات و فرشات الباعة الجائليين و المحلات... الخ ، لذلك يحق للمشاة السير في وسط الشارع ، لمزيد من الأمان ، راجع القاعدة السابقة.